文•吳鈞洋
相見時難別亦難
我有個朋友，依家行緊行(癸巳)運：破軍化祿武曲居巳垣；原命文昌化科，命宮兩旁空劫相夾，大運太陽在午垣父母獨守，原命天機化權太陰在申垣田宅；天馬同度，紫貪守事業酉垣；照妻宮在卯，會原命廉貞化忌守財帛在丑。
由於空劫夾祿；文昌同宮，貪狼化忌沖起原命廉貞化忌關係，本身響呢個運經已終日有得走冇得抖，一味得個做字而有名無利，再加上父母太陽午宮太耀目而奪田宅月亮(太陰)之輝，不論在工作地方抑或屋企不利女性嘅現象極明顯，而所謂不利者：一係冇緣份一係唔啱key，更甚者對女親人仲會刑剋添！故此入咗呢個運幾年間，公事上除咗同女上司唔夾；和女同事諸多拗撬之外，遇上啲麻煩惡搞事；十居其九係同女人有關。至於家宅方面，剋咗阿嫲外婆舅母在先，跟住阿媽又患咗頑疾，最後連個老婆都走埋佬；要離婚收場。離完婚之後，再識親啲女人都冇結果，感情兜兜轉轉離離合合只落得傷感兩個字，呢啲都係歸咎於運程：太陽奪太陰光輝而不利女性，空劫夾文昌不利婚約之故也。
02年(𡈼午)命宮太陽居午，太陽遇上破軍運，特定格局是：陽遇破軍必有桃花入宅，呢一年兄弟宮武曲化忌破軍化祿，有緣響臺灣結識咗一位佳人，經過三角關係鬥餐死；最終爭贏奪得美人歸而共賦同居。朋友家住香港，工作卻要上北京，既然組織咗新家庭自然馬不停蹄奔走於：港，臺，北京三地之間，雖然辛苦倒樂也融融，並且計劃好03年(癸未)結婚了咗件心事。02年(壬午)朋友曾經為婚事向我請教，而我亦開命盤為佢品評過，當時得出嘅答案係：相見時難別亦難！原因在於：流年坐天府在未垣本有安定不動之徵，
流年遷移宮廉貞原命化忌，被福德宮貪狼化忌會照沖起，妻宮破軍雙祿遇文昌而被空劫一併夾去而冇剩(空劫夾祿見忌反吉，可以因忌被夾而救祿及救文昌，否則連渣都冇得剩)
。
結果03年春一場沙士疫症，朋友去到臺北先被隔離咗拾幾日，再返北京又被隔離困住走不得，如是者擾擾攘攘搞咗半年有多，正應咗相見時難別亦難條數。
到咗今年運程已經轉入甲午太陽化忌運，午宮太陽化忌可以減輕耀目刺眼之不吉，起碼搶太陰(月亮)嘅光冇咁犀利同霸道，再加上今年(甲申)命宮天機太陰，甲祿在寅遷移宮，太陽雙忌守妻宮，太陽嘅失輝只不過應數在女家男丁有意外，而月亮嘅光華卻得以彰顯，故此批斷朋友今年之內可以順利乘龍拉埋天窗。
東風無力百花殘
我有個遠房女親戚，生肖屬羊，算起來今年足歲48矣！呢位親戚身世都幾坎坷，童年時先剋死老媽子，及後老豆又因工傷意外而死亡，佢未讀完中學就出身做嘢，因為冇細藝之故只能下海操迎送生涯(做舞女)。份工終日俾男人糟質固然身心疲累，講到愛情運更加半世坎坷不堪提！整個青春運幾番遇人不淑，嫁咗四次而冇一次幸福，次次唔係俾人拋棄就係俾人騙財騙色，到孻尾連私己錢都被人呃個清光，仲生埋下幾個唔同姓嘅仔女要靠自己捱生捱死湊大。如果幾個仔女生性嘅話，還心甘命抵旨望下半世有所倚靠，最慘係佢旨望幾個仔女長大成材，但幾個仔女卻唔生性；好似奉旨一世要靠老母養咁，老媽子含辛茹苦養大佢地非但享不到福，年近半百仲要捱到隻狗作倒貼。今年初女親戚突然下體流血不止，經醫生檢查後證實患上咗未期子宮頸癌，睇嚟都唔擺得幾耐.......咁苦命嘅女人，挨咗半世走咗當一世，佢嘅遭遇確實值得同情！但諗深一層，莫非前世做錯乜註定呢世得到噉報應！講到尾都係條命生得唔靚之故也。在徵得女親戚同意之下將佢條命寫出嚟供大家研究，相信世間上好似佢一樣苦命者為數不少。
坤造：庚
乙 庚 乙
辰 卯 辰 未
時 日 月 年
花卉乙木生辰月弱木仲有餘氣，兼且卯未會木局；卯辰暗東方，木氣唔弱而木質更加強，然而春木算你强極壯極也不過屬於嫩木幼苗一類而矣！至於庚金卻係刀斧之利器，精鋼之物質，辰月春金雖然還處於弱勢，但濕土能生金，精鋼利器響呢個時候劈大樹或許唔夠力度；但破嫩木幼苗則綽綽有餘，更何況庚辰一柱係魁罡(金之至銳)
，雙重出現在五行中，必然劈木紛花片片。如果五行中有甲木透天干則(藤蘿繫甲可秋可冬)
，假如五行裡見丙丁火亦能(懷丁抱丙跨鳳乘猴)
。奈何成條命只見一堆乙木同埋庚金，甲丙丁全部隱哂形，強金弱木兩神成象，響敵強而我寡形勢下，弱木必被強金傷盡無疑。五歲上運，35歲前行巳午未火運，雖則傷官見官卻還有逍遙自在運走。35歲天干甲木助力夠強，雖然婚姻挫敗卻仍然有開心日子過。不幸到咗40歲後跨鳳乘猴轉入申酉金，運程已經行至強弩之末，東風質地嘅乙木進入地支(申酉)金運；自然無力挽狂瀾而被強金傷及下身，恐怕到咗55歲之前嘅酉金金刃之運亦係壽元盡頭嘅時候矣。唉！正應詩句中之：東風無力百花殘含意。
春蠶到死絲方盡
坤造：乙
癸 己 乙
卯 卯 卯 亥
時 日 月 年
以上係一位老太太嘅命格，佢童年時隨父母移民南洋，後來再去美國攻讀大學。畢業之後嫁咗個南洋闊佬，幫老公手做生意，生咗六個仔女，老公盤生意越做越大，六個仔女亦越大越叻(個個響社會極負盛名)。中年約莫48歲左右，老公唔好彩去咗(賣咸鴨蛋)
，於是乎全盤生意由佢接手打理，經過咗一番努力之後，將盤生意拓展至跨國企業，直到目前為止生意仲有極佳發展潛質。老太太今年已經70歲矣，精力仲旺盛過人，機構大權緊握在手唔下放，睇佢條命嘅運勢應該還有十年八年玩下去。點解呢位老太太咁好命水同埋咁有精力呢？原來佢條命屬於：春蠶到死絲方盡格局。
癸水生響初春二月，除月干獨透己土外，四柱純乙木透天干會地局，屬於正宗：(傷官格)變格而成(從兒格)，古書有云：(從兒不論身強弱；只要我兒又見兒)
，行入火地合乎(我兒又見兒)木生火財旺運，行入金鄉則合乎(從兒身強)傷官配印旺名運。五行欠金欠火，但地支三卯暗沖酉金，天干雙乙木暗合庚，強金(傷官配印)有情來就我，比起明金顯現命中更吉利。所以先讀書有成而後社會得名，正係靠暗金嘅功力成全。44歲前行巳午未南方財運，一路旺夫益子冇衰過。直到未運；亥卯未會木局傷去己土而剋夫，隨即轉入申酉戌西方印運，大權在握名利雙收，福祿壽全進入晚年。
蠟炬成灰淚始乾
某君係生意人，年輕有為，卅來歲已經發到叭叭聲，佢條命係：己土生卯月，地支三個卯木一個辰土，天干透甲木；兩點丁火，五行欠金欠水。成條命木多剋土；而土弱過鬼，單靠兩點丁火焚木生土，而木太多鬱火，邊夠力焚呀！(若然有點丙火透出嘅話，格局就唔同哂！)
，呢種命係叫：(殺重身輕) ，42歲前行巳午未南方運，因南方火旺生土兼焚木條命差極仲有個譜，當42歲後轉入西北申酉戌陰寒運程時，嗰兩點星星虛火有如(大海孤燈)；分分鐘會熄滅，救命火如果有乜依郁嘅話，咁就大鑊囉！仲有樣唔妥地方係二月過咗驚蟄，陽暖經已進氣，呢過時候如果火太燥嘅話，就算燒哂啲木而旺土，土亦嫌太燥而冇孕育生機，再加上五行欠金水，有乜冬瓜豆腐定然衰響金同水方面嘅嘢。
32歲交入辛未運(頭五年行天干辛金，後五年行地支未土，天干運時地支要參考三分)，頭嗰五年辛金運，由於天干甲木生旺兩點丁火，地支未土同時間有火氣旺己土，辛金非但劈唔倒木反而被丁火熔埋。所以事業運如日中天，生意做大咗而搵錢有如豬籠入水，殊不知呢個卻係死運開始！因為個運後五年嘅未土，係應旺木投墓，當命運發過之後，分分鐘會玩完拜拜。
響丙子(96)嗰年，忽然間發覺條頸側邊起咗舊(硬嘢)
，到醫院經過一系列檢查後證實係患咗喉癌，真係晴天霹靂，發夢都諗唔倒！人當然諗唔倒啦，命運吉凶卻一早註定哂矣。至於衰邊瓣就要睇辛金運了，辛金在五行屬肺經，而原命五行木過旺係傾向腫瘤症候，呢五年運時唔論你運程點靚法，早已經有火旺剋金傷肺(喉屬肺經管)嘅伏筆，生瘤亦唔係奇事。丙子年地支子卯三刑，天干丙火俾辛金合咗去，呢年係要應數發病。
丁丑(97)天干三點丁火生己土，地支丑未年運相沖而沖旺土，經過化療電療，病情亦穩定下來，戊寅(98)天干戊土混和己土變強土，地支會寅卯辰東方木；與運支卯未木局而成木方混局，火旺喺天干不怕木強，療程告一段落。己卯(99)天干己土合住甲木，地支卯會運支未，煞在四柱之外，五行天干丁火冇傷到，流年平安。庚辰(2000)天干庚金劈甲木生旺丁火，地支辰土重逢濕泥旺土，流年龍精虎猛，事業財運亦勁旺到冇人信。辛巳(2001)天干丁火得地支巳火生旺而火長明，流年表面上比起正常人還健康，心廣體胖連醫生也認為醫好嘅成數極高，至於生意業務更進一步擴充，一切都在向好方面走勢嘅時候.....
殊不知運程巳經靜雞雞進入咗辛未運後五年嘅未土，格局旺木投墓之危機已在逼近中，至於申酉戌西北運嘅金水陰寒氣同時間正在蘊釀發生。壬午(2002)天干壬水有合丁火嘅意欲，只不過一壬合唔到二丁，地支午火合未土而生旺丁火，延續過往數年生意嘅旺勢，在呢年夏天發展至上市公司。
亦因為咁樣而令佢步向死亡，要知道身弱命格局官殺投墓庫，響五行叫做：隨鬼入墓，如果發過之後，再加上未來運逆轉而傷用神嘅話，多數會玩完。所以2002年立秋過後，某君突然間再病發，入醫院檢查後發現癌細胞已經失控擴散至全身，醫生認為任何治療已經起唔倒作用，在將交癸未年(2003)立春而藥石無靈仙遊西去。
查五行生剋制化：癸未年天干癸水與壬午年天干壬水，一合丁而一沖丁，未年地支與大運未土；強木雙重投墓，呢一年壽終拜拜係命運定數。木旺入墓，好似燃燒緊嘅蠟燭燒到盡頭成灰燼，而不能延續燭光再燃點下去，詩句中：蠟炬成灰淚始乾最貼切不過。