萬一靠唔住，八九有支持
月尾又到咗寫稿日子，下個月貪狼化忌，貪者貪官、而狼者係狼過華秀隻狗，唯獨化忌即係「末路」，既然玄機註定不貪官將受清算，再寫文章屬於多餘、兼且有失忠厚。如此一來要寫啲乜先至有建設性、認真頭痕。
正在納悶的時候門鐘忽然響起，係乜水呢？神兆機動促使我手痕而起出一卦：「山澤損」卦變「地澤臨」，坤為用神（大肚腩），卦體兌為澤（口不擇言）。屈指一算、不禁大樂：「又肥又多嘢講，除了戙企水魚他還有誰？」。開門之後果然沒算錯。「本以高難飽，徒勞恨費聲，五更疏欲斷，一樹碧無情，薄宦梗猶汎，故園蕪已平，煩君最相警，我亦舉家清」大編輯搖頭晃腦地邊吟着李商隱那首「寒有懷」而邊行進門，「咁有雅興呀，老而不！」我笑笑口揶揄他：「莫非贏了股票？」，「喂！咪亂起花名……唉！如果有蚊Li入袋就唔使吟呢首（寒入懷）名詩」大編輯打個呵欠答道：「嗱！成首詩嘅新潮意思係咁：無底深潭餵極難飽，輸干輸淨費事出聲，五更心碎想死了斷，恨碧眼害人冇陰功，魂飛魄散有排唔定，故園賤售平倉止蝕，望君以後時予警醒，我E家乜卵都冇清！」聽過大編輯歪理的詮釋後不禁噗嗤失笑：「李商隱睇住隻蟬響樹上疴尿而無病呻吟早被後人詬病，而你條粉腸竟然將人首名詩胡亂作詮釋……」，「你夠係囉！你又點知隻蟬響樹上疴緊尿？」大編輯矇着眼笑指我而言，我愣了一下子也笑着回指他，彼此相對而大樂。隨即，老而不嘆了口氣道：「喂喂，老吳，你話今勻點死！」，我笑着接道：「你死好喇，咪拉埋我！」，「唔係呀，我意思係金融海嘯如何收科？」大編輯哭喪着臉而聲大大：「步履摩！我仲揸咗成手貨架，否則唔會邊行邊吟首寒入懷喇！」，「乜話，你邊行邊淫手寒入懷？嘿嘿嘿嘿！」我忍不住打趣他，老而不笑笑口答道：「我冇咁壞！」，大家又忍不住笑了一陣。我隨着答道：「E家仲有貨在手，咁你有排煩矣！你㩒鐘時我為你起了支卦（山澤損）卦變（地澤臨），卦體兌為澤，坤為用神。照卦睇死唔去嘅！之不過亦冇咁快（解放翻身），猶其明年己丑兌卦投丑墓你仲衰多二錢，寅卯辰巳我睇好2014年癸巳，到時耶蘇至可以打救你……哈哈！」，「唔該你講個救字時咪讀去聲……乜話，要2014年呀？咁我暈喇！」老而不作企唔穩狀……
這時門鐘又再響起，是偉哥和半咕嚕一齊進門，據他倆說是在樓下相遇。「點暈呀！俾二奶飛起？」偉哥笑問老而不，「係都冇咁慘！你嚟得啱喇紫微超人，你如何預測後市？」大編輯見到偉哥如見救星，「甚麼，Vigra是Superman？」半咕嚕感到奇怪，「吃了Vigra不就變成Superman，很奇怪嗎？你個鬼仔莫驟亂歌柄，先行埋一便！」大編輯不耐煩地對半咕嚕說，鬼仔朝他辦了個鬼臉作回應。「唔怕一萬最怕萬一，即係話短期內先見萬一，再試八千」偉哥修修悠悠答道：「用番老吳去年嘅〈二五理論〉推算：去年本地指數在炒上「三萬」到位與未到位之間，亦即係「二黑五黄」疊見「五黄」之際便來個「亮晶晶」直插水而驗證「二五」凶象……，從此一蹶不振。老實話，當年紅軍二萬五千里長征到革命成功剩低嘅英雄唔知夠唔夠十分之一，正宗係死剩種。配套股民入此數、真係烈士數（36），照咁睇，希望本地指數於三六九之9000點企得住。」，「敢就Yart蕉矣！」大編輯呱呱叫道，「學哪個four eye’dog擲banana……」半咕嚕拍手笑道，大編輯也忍不住笑了起來：「毓民冇膽，若然換了是我一定要佢蕉掛爛額凸龜首……」「超！攞嚟講，換了是你睇怕爭住Yart蕉以示忠心、甚至大有可能跳起忠字舞添！嘿嘿！」我作篾視狀而冷言冷語嘲弄大編輯：「毓民係精叻仔，一排飛歪咗嘅蕉製導彈，可以保證下屆鐵票連任，身價仲分分鐘搶高你長毛幾個馬頭添！喺經濟低迷之日子，（議員）呢碗飯最容易食，只要夠爛佬、好過賣牛肉麵多多聲。毓民，平時開立法會議時切記準備多啲生菓以備不時之需，好似今次為市民爭取生菓金而擲生菓，竟然可以俾你博懵成功……也確係異數。」，「好喇！咪講埋啲痛心事，好似黃河大合唱有段：傷心事、莫提起，我的命運不如你……」大編輯嘆了口氣，「為國家當兵去，太行山上打游擊……」半咕嚕不禁接着老而不唱下去，「喂喂喂！開演唱會咩？講到明傷心事莫提起，你仲唱下去？」大編輯舉手示意半咕嚕stop：「總之以後新聞唔乜睇、電視bu yao kan、收音機唔墨chu ting…..」「你做邊行架，肥佬！」偉哥忍不住開腔：「不如我去坐你個位吖！」，我接着說：「你去坐喇！三煞位嚟架，仲分分鐘上咗去落唔返嚟，嘿嘿嘿！」，大家又笑餐飽，大編輯木木嘴用手指朝我回敬了個不文動作，繼而向偉哥發問：「係喇，紫微超人，E家記起問你，明年點睇？」，「何不問老吳？」偉哥欲將太極耍向我，「你咪答下佢Lo，何必謙呢？」
我回道，「明年文曲化忌，最明顯徵兆係毁約，講嘢唔算數，假如今年各國提出嘅挽救金融機構之方案，明年發覺原來係齋翕嘅話，咁就真正大卵鑊矣！」偉哥屈指算道：「另一方面，最弊係仲有大鑊嘢仚實尚末爆出，至文曲化忌也驗於生意結束和做手術……呢啲就係文曲化忌嘅陰質層面。」，「我暈……」不知是否咋諦，老而不真箇似企唔穩，我立刻推張沙發椅給他座：「唔唔唔……要唔要藥油呀？」，老而不搖搖頭，「童子尿呢？」我繼續打趣，答道：「你有咩？超！」引得大家又開心了一陣子。忽然間半咕嚕問偉哥：「紫微加超人，你是紫微的superman？」，「No！是不同紫微的superman」死老而不應該又有搞笑伎倆：「他super的地方很men，你有時間買本車men Mao註作的（論持久戰）研究研究就知道他如何superman矣！」我和偉哥聞後又大笑一餐，至於半咕嚕則ngao哂頭，「去瞓覺啦！老而不，老毛本（論持久戰）講嗰尾嘢咩！教壞細路」我忍不住出言頂撞老而不：「使乜轉彎抹角嗻，索性教他superman係指性能力比人強咪得Lo，真係化簡單為複雜！」幾個人連同我均陰陰嘴笑，半咕嚕瞄了偉哥一眼伸伸舌頭豎起了手指公。「你哋覺得政府整嗰條官方（龍）有乜睇頭？」大編輯忽然發問，「似龍魂」我答道，「講乜呀，乜叫龍魂呀？」各人聽不明而疑惑着，「龍魂咪龍魂Lo，即係死了的龍嘅靈魂」，各人聞後頓了一下隨即不約而同地爆笑，偉哥道：「睇落幾似噃！全無龍之威武只得個影咁十足魂魄」，「睇落又似龍鳥多啲」，「不，似龍雞多」大家七嘴八舌討論過不停。
「聖誕節左右太陽太陰俱化忌沖起天機化忌，明年文曲化忌又進氣，老吳，你點睇？」偉哥面帶憂慮之色問道，我答道：「嗱！股市呢個月再大跌係意料中事，之不過希望黑人總統奧巴馬大步檻過，否則大有機會應了鬼仔把衰口……」「What？」半咕嚕丈八金剛摸不着頭腦，大編輯接着提醒他：「超！你上次不是咒人家食泥咩？」，半咕嚕聞後醒起：「不是咒他，在美國真的很多人怕黑人上臺做總統！」，「你呢？」大編輯問，「我喜歡他，我跟雷叔叔一樣不喜歡布殊」半咕嚕答道。
說到這裡我看看鐘，又快到吃飯時候，於是乎大家整裝而發覓酒樓食肆祭肚去也。