「豬鼠牛」，豬流感後到鼠牛？
幾條友煉咗一排氣功之後、個個異口同聲都話有料到，猶其係大難財、佢話最近食親補品都會流鼻血，着多件衫也會流汗，仲有係近排覺得個黃面婆好似靚咗添……我回道有冇咁誇張呀！但無論如何總要恭喜佢哋，千祈咪「龜公」於我，嘻嘻！
嗰日係星期天，大家和議偉哥提出是晚聚餐的提議、算係清明聯歡兼慶賀「煉出功」之喜（「煉出功」係老而不提出嘅宴會題目）。
如是者晚間去番嗰間靚女招待不少嘅酒樓，各人剛入座坐低櫈都末坐暖，大難財已急不及待地向我揮手欲有所言……「咪猴擒，我知你想問乜，之不過飲杯茶先啦！」老而不微笑着存心吊大難財癮，我接口道：「你係咪想問墨西哥點解咁黑嘛？」，除了大難財點頭外，其他人均眼定定地望着我想知答案。「嘿嘿！有名畀你叫，墨西哥、即係：黑過墨斗也、阿味哥！」我說道：「話就話今勻啲菌叫做（豬流感），查實係禽流菌之人傳人變種……唉！文曲化忌值年而（豬鼠牛、煞曜南北有排愁）……講唔埋遲下仲會有（牛流感）出現添！」，各人聞後均鴉雀無聲，你都咪話唔面青。
「有乜辦法呀，你哋唔記得吳獅虎（兌金入丑墓、九運香港領風騷）嗰篇文章提到咩：真正慘絕人寰係入咗八運嘅五年後之今日，由於（乾兌金）代表性之歐美正式步入運勢淘汰大象，全世界全人類無一可免……至於醫事方面自（沙士）以來非但全無進步，還衰足六年，根本冇得賴、而要歸咎於運勢要求將兌金七運擁有代表性之一切來個全面淘汰，而醫療係最具代表性之一（當年沙士重災區：淘大，根本就大象提點：未來﹙亥子丑﹚之水三歲正是醫療部門汰舊立新日子）……獅虎，你話係唔係呀？」老而不皮笑肉不笑地沖着我說，隨即自言自語：「正一烏鴉口，唔衰嘅唔講！」，「大聲啲啦，老而不！唔使吟吟沉沉嘅，超！你以為我係耶和華呀？講嗰樣驗嗰樣，咁靈就好世界囉！」我笑語老而不。「不過講開又係噃，難道真如你呢個月風水預測：本月星數，月飛星五黃臨正西，受宮位年二黑病符星和中宮月星九紫曜射而刺激起煞氣……月內天災人禍、社會不寧、經濟危機……等等不吉都集中發生於上述地域國家。由於五黃屬（劣火）備受刺激，預料西方國家月內天災只有增加而不会減少，災難性事件也此起彼落……」偉哥問我：「咁……嚟緊場災難會唔會擴大呀？唉！須知道政治好醜有得測，災難到來防不勝防呀！」，大難財和兩條靚聞後也點着頭用請教的目光望向我。
「記得2003年八字：癸未、甲寅、戊申、己未，土木並旺，水洩弱金兼沖缺，五行獨欠火。然而細察其中：月日地支寅申相沖三刑出巳火，年時兩未暗合午火，地支巳午未暗出南方火。寅申相沖擦出火花必向上燃，天干甲木自然承接生旺，丙火因此無中生有。全盤：木火土均旺極，到底金水無氣，整個農曆六月份前都是火炎土燥木偏枯局面……。今年2009年八字：己丑、丙寅、庚辰、丙子，正月寒金、因自坐魁罡而弱中呈強，初春餘寒未了、因有驕陽沐浴而軟玉溫潤。地支有壯木生火而火不虛假。略嫌五行火炎焚木復焦土，妙在子辰「水局」及子丑「北方」從中中和大局而養木滋土。年柱己丑濕土因暖濕而確保生金有力，整個局面呈現「殺印相生」大格局：以己丑土為樞紐，化丙火而生庚金，用水生木、用木生火、火旺足以生土。木土若燥則用水調和。如是者，上下恊調相生有情，左右同志維系無間……。由五行觀察，03年與今年流年太歲天剋地沖，前者五行偏枯、後者地潤天和，不可以同日而言。所以我始終認為今年（豬流劫）呢單災難並唔係想象中咁大鑊……」
我一口氣地道出了相關五行玄機，略作沉吟思考之後、繼續說話：「再睇埋去年立春八字：戊子、甲寅、甲戌、甲戌，五行日元甲木生正月木旺之際，天干朋透甲木、坐祿存扎根於月提寅木。四柱同時土旺逾度，五行缺金欠火而滴水蒸干，格局呈現兩神成象。雖然木壯剋土而財來就我，唯獨五行不全，全盤大象顯得偏枯。農曆七月庚申，月堤甲寅遭逢天剋地沖，明眼見到木壯砍崩刀嘅大象，東風壓倒西風係意料中事……。我到底堅持自己之看法：八運由2004年至今已過咗五年，由去年開始，兌金正式入丑墓係時候矣！西方嘅代表係美利堅合眾國，今年國運衰到貼地係不爭之事實，還有佢哋個前總統布殊、生時累朋友死後累街坊，呢一點全人類無人不知，也可以話係人都領過嘢！猶其喺佢周邊嘅國家、你話好世界而太平嘅話，反而屬奇跡而要搵神父去研究下原因」，說話引得眾人一陣笑聲，老而不瞇著眼睛扮了個鬼臉：「嗱！五一過後立夏，飛星二黑入中宮，必然刺激正西年二黑、再曜射正北、東北年月五黃，你話我們親愛的祖國……」我笑着接唱：「從今走向繁榮富強……唉！今年好難有呢枝歌唱矣！真怕豬流感H1N1先掃入世界中宮：中東、印尼、巴基斯坦……然後再擴散至中國、日本、整個朝鮮半島」，「立夏後文曲雙化忌嘛！」老而不說，偉哥搶著笑話：「嘻嘻嘻！小心呀大編輯，老吳舊年唔係話過今年流年係老而不化忌咩！」，老而不白了他一眼說道：「我化忌與否有乜相干？最怕你偉哥化忌人家服食無效…..咁就弊家伙囉！」說話引得哄堂大笑，我也忍不住咭咭笑出聲：「最慘係寬衣解𧜵之後……好嘞！講番正題，農曆四月下旬、即係約莫5月21日入咗小滿之後，芒種月令進氣……」，大難財搶答道：「係唔係聞到端午節糉香呀？」，「希望到時你有心情食啦！須知道芒種呢個月一白入中宮而五黃飛正南，年月南北五黃對沖、正西西北二黑煞曜連貫，如是者月內係如假包換（豬鼠牛、煞曜南北有排愁）」，話音剛落、大難財條靚口顫顫問道：「師傅，咁……情形會唔會惡劣得過沙士嗰年？」，我答道：「驚咧，嘿嘿！我剛才咪講過，我始終認為今年（豬流感）呢單災難並唔係想象中咁大鑊咩？」，老而不接着說：「唔使劣喎！E家八運主正氣，衰極有個譜……」，我笑着接話：「老而不今勻講嘢最有紋路，值得一讚！」，老而不聞後作不屑狀：「咁以往說話算係乜？」，我大笑回道：「算係不由正路而勁排一氧化碳廢氣囉，哈哈哈！」，各人聞後眼淚水也笑出，唯獨老而不不明而笑問：「如何不由正路而勁排一氧化碳？」，說話引得一眾人等笑到喘不過氣，大難財代我答道：「即係話你老而不滿口屁話……哈哈哈哈！」，老而不聞後扮了個鬼臉、再朝我豎起了中指。
一輪話之後，開始上菜祭肚，有得食時大菌食細菌，話之你禽流感、豬流感、牛流感……。